Ákvörðun liggur fyrir á næstu tveimur vikum

Umboðsmaður franska miðjumannsins Robert Pires hjá Arsenal segir að það komi væntanlega í ljós á næstu tveimur vikum hvort leikmaðurinn verði áfram í London, en hann er með lausa samninga í sumar. Pires vill vera áfram hjá Arsenal, en heimtar tveggja ára samning á meðan Arsenal býður aðeins eins árs samning fyrir leikmenn á hans aldri.

Pires hefur verið orðaður við skoska liðið Glasgow Rangers og eins halda spænskir fjölmiðlar því fram að hann sé á leið til spútnikliðsins Villareal. Pires er 32 ára gamall og gekk til liðs við Arsenal fyrir 6 milljónir punda árið 2000.