Ríkisstjórnin vill hækka barnabætur

Halldór Ásgrímsson, fráfarandi forsætisráðherra, gerði grein fyrir stöðu mála við endurskoðun kjarasamninga á sínum síðasta ríkisstjórnarfundi í gærmorgun. Hann sagði að ríkisstjórnin væri tilbúin að koma að jöfnun lífskjara með öðrum hætti en ætlunin hefði verið.

"Það er sjálfsagt að taka tillit til þess sem er verið að gera og þeirrar aðferðar sem höfð er við launabreytingar," sagði hann eftir ríkisráðsfund á Bessastöðum og bætti við að gerðar yrðu ýmsar breytingar í skattamálunum.

"Við leggjum ekki jafnmikla áherslu á prósentulækkun að því er varðar tekjuskattinn og tökum meira tillit til persónuafsláttar. Við höfum lýst því yfir við verkalýðshreyfinguna að við föllumst á tillögur varðandi barnabætur og vaxtabætur. Við teljum að hækka eigi skattleysismörkin verulega í núverandi kerfi en óskynsamlegt sé að skipta um tekjuskattskerfi."

Halldór kvaðst hafa vonast til þess að viðræðunum yrði lokið þegar hann léti af embætti forsætis­ráðherra en það hefði ekki tekist og það myndi taka allt að viku að ljúka samkomulagi. Útlitið sé þó gott.

Hvað varðar kröfu um breytingar á lífeyrismálum ráðherra og þingmanna sagði hann frumvarp liggja fyrir í forsætisráðuneytinu og fyrir forsætisnefnd Alþingis en ekki væru allir tilbúnir að fallast á þær. "Þær breytingar sem verða gerðar þurfa líka að hafa stuðning allra flokka. Það þýðir ekki fyrir einstaka flokka að hlaupast undan ábyrgð," sagði hann.

Geir Haarde forsætisráðherra sagði að eitt af sínum fyrstu verkum yrði að fá botn í viðræðurnar við aðila vinnumarkaðarins og reyna að greiða úr því og berja niður verðbólguna þannig að "viðunandi verði fyrir alla. Þó að þetta sé tímabundið ástand þá þarf að grípa í taumana."

Vilhjálmur Egilsson, framkvæmdastjóri SA, segir að fundað hafi verið með formönnum landssambanda ASÍ. Á næstunni verði gengið frá tæknilegum atriðum. "Það getur haft alvarlegar afleiðingar ef þessi atriði eru ekki í lagi. Skilningur verður að vera nákvæmlega sá sami þannig að það er rétt að eyða hugsanlegum misskilningi sem getur komið upp. Síðan er vinna í gangi varðandi vinnumarkaðsmálin."