Gagnvirkt sjónvarp væntanlegt

Hagnaður Símans fyrstu sex mánuði ársins var tæpir 2,2 milljarðar króna. Á sama tíma í fyrra nam hagnaðurinn rúmum 1,2 milljörðum. Tekjur félagsins hafa aukist meira en útgjöld á þessum tíma. Mest var tekjuaukningin á farsímasviði, um 450 milljónir króna. Í uppgjörinu munar þó mest um hagnað af sölu hlutabréfa í Straumi fjárfestingarbanka, sem var 702 milljónir króna. Einnig voru seld hlutabréf í gervihnattafélagi sem skilaði 106 milljónum í hagnað. Arðsemi eigin fjár hækkaði úr 16 prósentum í tæpt 31 prósent. Í tilkynningu Símans til Kauphallar Íslands í gær segir að fjarskiptamarkaðurinn sé í örum vexti og framtíðarhorfur fyrirtækisins góðar. Síminn hafi ráðist í stóra uppfærslu á ADSLkerfinu til að geta sinnt sjónvarpsþjónustu Símans. „Að uppfærslunni lokinni verður hraðinn meiri, sjónvarpsstöðvum í sjónvarpsþjónustu mun fjölga auk þess sem gagnvirkt sjónvarp er handan við hornið,“ segir í tilkynningunni. Í uppgjörinu kemur fram að Síminn á tæp 90 prósent hlutafjár í Íslenska sjónvarpsfélaginu, sem rekur Skjá einn. Á tímabilinu breytti Síminn 750 milljón króna skuld sjónvarpsfélagsins í hlutafé. Ekki er gefið upp á hvaða gengi Síminn keypti hlutabréfin í Skjá einum. Bæði greiningardeild Landsbankans og KB banka segja rekstrarárangur Símans á öðrum ársfjórðungi betri en spáð var. Starfsfólk beggja bankanna gerði ráð fyrir því að Síminn myndi hagnast um 780 milljónir króna. Niðurstaðan var hins vegar 928 milljóna króna hagnaður.