Vill umræðu um vinnubrögð

Í bréfi til háskólasamfélagsins kallar Helga Kress bókmenntafræðiprófessor eftir opinni umræðu um vinnumat og rannsóknaraðferðir. Þetta gerir hún í framhaldi af umræðu um vinnubrögð prófessors Hannesar Hólmsteins Gissurarsonar við ritun bókar um Halldór Laxness, sem út kom árið 2003. Helga segir forstöðumann rannsóknasviðs Háskólans hafa upplýst hana um að Háskólinn viti ekki hvernig rannsóknarfé Hannesar vegna vinnumats sé varið. Hún segir engin viðbrögð hafa borist frá rektor um málið. Í bréfi sem Hannes Hólmsteinn sendi til starfsmanna Háskólans á föstudag kemur fram að hann sé sammála gagnrýni Guðmundar Jónssonar prófessors í sagnfræði og Helgu Kress um að í bók sinni hefði hann átt að vísa oftar í Peter Hallberg og Halldór Laxness sjálfan. "Ég hélt, að ein allsherjartilvísun í eftirmála, þar sem ég tók fram, hversu mikið gagn ég hefði haft af ritum Hallbergs, nægði. En ég sé nú, að svo var ekki," segir Hannes í bréfinu og segir að þarna hafi hans eigin athuganarleysi verið um að kenna. Þá kemur fram að hann vinnur að svari við ritgerð Helgu þar sem hún gagnrýnir heimildanotkun hans. Bréfið var svar við opnu bréfi Guðmundar þar sem hann fer fram á að háskólayfirvöld taki föstum tökum ásakanir á hendur Hannesi.