Tölurnar komu frá NCC

Byggingarverkfræðingur hjá norska verktakafyrirtækinu NCC staðfestir að hann hafi fyrir hönd fyrirtækisins unnið skýrslu fyrir Árna Johnsen um kostnað vegna jarðganga til Vestmannaeyja. Í fréttum Stöðvar tvö á miðvikudag sagði Øvind Kvaal, talsmaður NCC, að fyrirtækið hefði ekki lagt fram útreikninga, mat, greiningu, tilboð eða kostnaðaráætlun um jarðgöng til Vestmannaeyja. Árni sendi fjölmiðlum íslenska þýðingu af skýrslunni frá NCC í gær þar sem fram kemur að hún sé unnin Svein E. Kristiansen, byggingarverkfræðingi hjá NCC Constuction Norge AS og Sverre Barlindhaug, jarðverkfræðingi frá Multiconsult avd. Noteby. Skýrslan er rúmar tvær blaðsíður að lengd og er sögð vera forathugun á jarðgöngum til Vestmannaeyja og byggist á "almennum jarðfræðilegum upplýsingum auk endurkasts- og bylgjubrotsmælinga á Landeyjarsandi og á sjávarbotninum milli Vestmannaeyja og meginlands Íslands." Þar segir að áætla megi að kostnaður við jarðgöng til Vestmannaeyja verði um 1.450 milljónir danskra króna, sem samsvarar tæpum sextán milljörðum íslenskra króna. Við kostnaðarmat er byggt á reynslu NCC af tveimur neðansjávargöngum frá Færeyjum auk lengstu vegaganga í heimi, Lærdal-göngunum. Fréttablaðið hringdi í Svein Kristiansen og hann staðfesti að hann sé annar höfunda þessarar skýrslu og hafi unnið hana fyrir hönd NCC. Aðspurður hvers vegna talsmaður fyrirtækisins hafi ekki kannast við það í samtali við Stöð tvö segir Kristiansen að NCC sé stórt fyrirtæki, með um 40 þúsund starfsmenn, og það sé ekki víst að Kvaal hafi vitað af þessari skýrslu. Árni Johnsen segir að reynt hafi verið að gera málið tortryggilegt í fjölmiðlum og að viðbrögð talsmanns NCC í frétt Stöðvar tvö skýrist af því að honum hafi verið komið úr jafnvægi. "Það var auðséð að þessu var stillt þannig upp að við værum að kynna eitthvað tilboð og skuldbindingar sem er ekki rétt. Þetta er áætlun á kostnaði byggð á forathugun og ég er eingöngu að kynna þessar hugmyndir," segir Árni.