Sýrlenski herinn fer frá Líbanon

Bashar al-Assad, forseti Sýrlands, tilkynnti fyrir stundu að sýrlenskar hersveitir yrðu kallaðar heim frá Líbanon. Búist hafði verið við yfirlýsingu þessa efnis frá forsetanum í dag, en í ávarpi á sýrlenska þinginu sagði hann að allur herafli Sýrlands í Líbanon, um 14 þúsund hermenn, skyldi fyrst fluttur til Bekaa-dalsins og þaðan til landamæra Líbanons og Sýrlands. Assad sagði enn fremur að hann myndi hitta Emile Lahoud, forseta Líbanons, í næstu viku til þess að undirrita samkomulag þessa efnis. Sýrlendingar hafa sætt miklum þrýstingi um að flytja her sinn frá Líbanon frá því að Rafik Hariri, fyrrverandi forsætisráðherra Líbanons, var ráðinn af dögum í sprengjutilræði í síðasta mánuði, en stjórnarandstaðan í Líbanon sakaði stjórnvöld í Damaskus um að standa á bak við árásina. Með þessum áformum Sýrlendinga uppfylla þeir loks sinn hluta Taif-samkomulagsins svokallaða sem undirritað var þegar borgarastyrjöldinni lauk í Líbanon fyrir fimmtán árum. Walid Jumblatt, helsti leiðtogi stjórnarandstöðunnar í Líbanon, fagnaði yfirlýsingunni en krafði Sýrlendinga um nákvæma áætlun um brottflutningi hersins.