Indiana vann í Miami

Lið Indiana Pacers minnir rækilega á sig í upphafi leiktíðar í NBA og í nótt vann það góðan 105-102 útisigur á Miami Heat. Jermaine O'Neal skoraði 27 stig og hirti 9 fráköst fyrir Indiana, en nafni hans Shaquille O´Neal þurfti að fara meiddur af leikvelli í síðari hálfleiknum með snúinn ökkla og missir væntanlega af næsta leik Miami.

Ron Artest, sem var í leikbanni nær alla síðustu leiktíð, hefur verið að finna sig vel undanfarið og hann skoraði 22 stig fyrir Indiana og átti gott spjall við David Stern áður en leikurinn hófst.

Dwayne Wade var allt í öllu hjá Miami Heat í nótt og skoraði 31 stig, gaf 10 stoðsendingar og hirti 6 fráköst, en þriggja stiga skot hans um leið og lokaflautið gall var aðeins hársbreidd frá því að tryggja framlengingu.