1. maí ekki haldinn 1. maí?

Fyrsta maí kröfugangan gæti heyrt sögunni til. Hún er barn síns tíma og stendur ekki undir væntingum að mati miðstjórnar Rafiðnaðarsambands Íslands. Verði stjórninni að vilja sínum gæti það einnig þýtt að framvegis verði haldið upp á 1. maí þann 3. eða jafnvel 7. maí. Miðstjórn Rafiðnaðarsambandsins segir að lítil þátttaka í kröfugöngunni ásamt athöfnum margs konar öfgahópa hafi eyðilagt þá áferð sem var á þessum baráttudegi verkalýðsins. Hún telur að núverandi fyrirkomulag sé verkalýðshreyfingunni ekki til framdráttar. Hætta sé á að hópurinn tvístrist og einhver félög taki höndum saman um að sniðganga gönguna sem væri miður á þessum degi og vatn á myllu þeirra sem eru andstæðir verkalýðshreyfingunni. Guðmundur Gunnarsson, formaður Rafiðnaðarsambandsins, segir að miðstjórnin hafi líka tekið eftir því að mörg stéttarfélög leigi sali undir kaffiboð og þeir salir séu fullir. Þar komi fólk saman og sé með fjölskyldunni á meðan verkalýðsforingjarnir standi nánast aleinir í fánaborg niðri á Lækjartorgi og skiptist á að flytja ræðu hvor yfir öðrum. Fáir hlusti á þá að undanskildum örfáum öfgahópum. Mælst er til þess að stéttarfélögin í Reykjavík sameinist um að halda víðtæka fjölskylduhátíð í Laugardalnum þar sem boðið sé upp á vönduð skemmtiatriði og aðeins eitt ávarp. Guðmundur er alls ekki viss um að sjónarsviptir yrði af hátíðahöldunum í miðbænum. Hann segir þau ekki eins vinsæl í dag og fyrir nokkrum árum. Ræður verkalýðsforingjanna 1. maí séu mjög sérstakar þar sem menn tvinni saman heilur raðirnar af yfirlýsingum. Fólk vilji ekki hlusta á þær og þá hljóti að þurfa að skipta um gír. En svo gæti farið að 1. maí verði alls ekki haldinn hátíðlegur 1. maí. Miðstjórnin leggur til að verkalýðshreyfingin sameinist ásamt Samtökum atvinnulífsins um að tekið verði upp það fyrirkomulag að ætíð verði frí fyrsta föstudag í maí í stað hins hefðbundan frídags 1. maí. Þetta kallar á fleiri frídaga á virkum degi en verið hefur hingað til en það telur miðstjórnin að leysa megi með því að líta til sumardagsins fyrsta og nýrra ákvæða í kjarasamningum um tilfærslu svokallaðra fimmtudagsfrídaga. Kostnaður fyrirtækja yrði svipaður og nú, hagræði þeirra augljóst og launamenn næðu betri og fjölskylduvænni fríum að þeirra mati. Formaður Rafiðnaðarsambandsins segir ekkert því til fyrirstöðu að þessi háttur verði hafður á í ár. Nú sé verið að panta lúðrasveitina og hátalarakerfið fyrir hátíðahöldin og lítið mál að flytja hvort tveggja í Laugardalinn. Ef sambandinu verður að ósk sinni verður fyrsti maí haldinn hátíðlegur föstudaginn 6. maí í ár.