Al-Qaida lætur að sér kveða

Osama bin Laden reynir nú að fá hryðjuverkaleiðtogann al-Zarqawi í Írak til að skipuleggja árásir á bandarísk skotmörk. Al-Qaida hefur lýst ábyrgð á sjálfsmorðsárásinni í Hilla í gær á hendur sér, þar sem minnst 125 létust. Fórnarlömb mannskæðustu árásar í landinu síðan Saddam Hussein var steypt af stóli voru borin til grafar í dag. 125 fórust og meira en 130 særðust. Hópur sem segist vera á vegum al-Qaida í Írak lýsti yfir ábyrgð á árásinni á íslamskri vefsíðu. Nýlegar upplýsingar frá bandarísku leyniþjónustunni herma að Osama bin Laden og hryðjuverkamaðurinn Abu Musab al- Zarqawi, leiðtogi al-Qaida í Írak, hafi átt í samskiptum að undanförnu og að bin Laden hafi hvatt al-Zarqawi til að skipuleggja árásir á bandarísk skotmörk. Al-Zarqawi hefur staðið á bak við fjölda árása í Írak og vísbendingar eru um að hluti samtaka hans starfi víðar. Hann hefur lýst hollustu við al-Qaida en er ekki sagður sammála bin Laden að öllu leyti. Richard Clarke, sem var einn æðsti maður í hryðjuverkateymi Hvíta hússins, segir að þetta skuli taka alvarlega. Almenningi í Bandaríkjunum hafi verið talin trú um það á undanförnum þremur árum að ekki yrðu gerðar fleiri árásir á Bandaríkin og hann telji að þegar slíkt viðhorf sé við lýði muni önnur bylgja árása ríða yfir. Ekki munu þó áætlanir uppi um að auka viðbúnað vegna þessa en skýrslu um málið hefur verið dreift í bandaríska stjórnkerfinu. Frönsk blaðakona, sem saknað hefur verið í sjö vikur, birtist í dag á myndbandi sem uppreisnarmenn í landinu sendu frá sér og bað um hjálp. Ekki hefur tekist að staðfesta uppruna myndbandsins eða aldur. Utanríkisráðherra Frakklands sagði í dag að málið yrði rannsakað nánar og allt gert til að hjálpa blaðakonunni.