Bílbeltaundanþága barn síns tíma

Undanþága leigubílstjóra frá bílbeltaskyldu er barn síns tíma, segir talsmaður Umferðarstofu. Hjón, sem tóku leigubíl með níu ára syni sínum í gærkvöld, kröfðust þess að bílstjórinn setti á sig öryggisbelti enda fór bílstjórinn fram á það, eðlilega, að farþegar hans sætu spenntir. Bílstjórinn neitaði hins vegar og benti á að hann væri í lögum undanþeginn því að nota belti. Skúli Björnsson, sem tók þennan leigubíl í gærkvöld, er hissa á þessu gati í kerfinu og segir bílbeltanotkun ekki vera persónulegt mál bílstjóra leigubíla eða atvinnubíla heldur stórmál sem snerti öryggi farþega, ekki síst þegar hafður sé í huga áróðurinn um „fíla“ í bílunum. Ef bílstjórinn kastist til í bílnum við árekstur geti hann auðveldlega drepið farþegana með því að verða nokkur tonn að þyngd, eða eins og einn fíll. Sigurður Helgason hjá Umferðarstofu tekur undir gagnrýni Skúla Björnssonar á undanþágu atvinnubílstjóra frá bílbeltanotkun. Hann segir að mun meiri hætta sé á að menn lendi í hörðum árekstri heldur en að þeir verði fyrir líkamsáras, sem séu rökin fyrir undanþágu leigubílstjóra. Hann muni eftir einni helgi í haust þar sem sex árekstrar hafi orðið þar sem leigubílstjórar og leigubílar hafi komið við sögu og það segi sína sögu. Þörfin sé jafnmikil fyrir leigubílstjóra og aðra. Sigurður segir að við þetta bætist að flestir leigubílar séu tiltöluega nýir og í þeim séu öryggispúðar. Ef fólk vilji að þeir geri gagn verði það að vera með beltin spennt. Aðspurður hvort farþegar geti verið í hættu, þótt þeir séu í belti, ef leigubílstjórinn er ekki spenntur segir Sigurður það rétt, að sama skapi og ökumaður og farþegi í framsæti geti verið í hættu vegna lausra farþega í aftursæti, ekki síst ef öryggispúði sé fyrir hendi. Hann ráðleggi því leigubílstjórum eins og öllu skynsömu og góðu fólki að nota bílbelti. Hann telji reyndar að núorðið noti leigubílstjórar almennt bílbelti þrátt fyrir undanþáguna.