Ekki úr greipum Bandaríkjamanna

Það sækir enginn menn í greipar Bandaríkjamanna ef þeir vilja ekki láta þá lausa, segir Davíð Oddsson, utanríkisráðherra, og telur allt hafa verið gert til að hjálpa Aroni Pálma Ágústssyni sem situr í stofufangelsi í Texas. Vonbrigði, segja ættingjar Arons. Aron Pálmi Ágústsson var þrettán ára þegar hann var dæmdur í tíu ára fangelsi fyrir kynferðisbrot gegn sér yngri dreng. Hann var sjálfur ellefu ára þegar hann framdi brotið. Aron afplánaði 7 ár af dómnum í rammgerðu fangelsi og eru nú í stofufangelsi í Texas. Hann má ekki fara út fyrir hússins dyr nema hafa staðsetningartæki bundið um ökklann. Íslenska utanríkisráðuneytið hefur að beiðni ættingja Arons tekið málið upp við yfirvöld í Washington og í Texas en án árangurs. Davíð Oddsson utanríkisráðherra segir málið allt hið dapurlegasta en utanríkisráðuneytið hafi gert það sem það hafi getað eftir því sem honum sýnist. Hann hafi lesið yfir hvað fyrri utanríkisráðherra hafi gert og hann viðist hafa farið í málið af fullkominni einurð og gert það sem hægt var að gera. Íslendingar sæki ekki menn í greipar Bandaríkjamanna ef þeir vilji ekki láta þá lausa, það sé algjörlega ljóst. Fréttastofa Stöðvar 2 sýndi Valgerði Hermannsdóttur, frænku Arons og helsta talsmanni hans, svör Davíðs en ættingjar hans hér á landi vonuðust til þess að Aron fengi að afplána það sem eftir væri af dómnum hér á landi. Valgerður segir að niðurstaðan sé mikil vonbrigði en hún komi ekki á óvart. Litlu sé við þetta að bæta öðru en því að heitasta ósk Arons Pálma sé að komast til Íslands. Hún voni ef þetta gangi ekki að Aron Pálmi haldi vistina ytra út. Valgerður segir að ættingjar Arons gefist ekki upp en þeir viti ekki hvað hægt sér að gera í stöðunni. Þeir muni styðja Aron en allt líti út fyrir að hann þurfi að vera í stofufangelsi og megi ekki fara út fyrir hússins dyr nema að hafa staðsetningartæki bundið um ökklann á sér í tvö ár og sex mánuði til viðbótar.