Áfram í 96 milljóna ábyrgð

Reykjavíkurborg verður áfram í ábyrgðum fyrir Landsvirkjun þó að 44,5 prósenta hlutur borgarinnar í fyrirtækinu verði seldur. Ábyrgðirnar nema nú 96,4 milljónum króna miðað við langtímaskuldir Landsvirkjunar um síðustu áramót og skiptist milli eigendanna eftir eignarhlutfalli. Búist er við að skuldir fyrirtækisins fari hækkandi eftir því sem framkvæmdir fyrirtækisins aukast. Stefán Jón Hafstein, forseti borgarstjórnar, segir að borgin verði áfram í ábyrgðum þó að hluturinn verði seldur. "Ábyrgð á lánum, sem tekin eru meðan Reykjavíkurborg er einn af eigendum fyrirtækisins, hvílir áfram á borginni." Borgarsjóður fær ábyrgðargjald að fjárhæð um 100 milljónir á hverju ári. "Síðan er hægt að semja um það að endurfjármagna lánin og létta ábyrgðinni af og kannski kemur það inn í þessar viðræður en það er klárt að þegar lánin eru tekin þá breytist ekkert við það þó að eignarhluturinn skipti um eigendur. Ábyrgðin heldur áfram," segir hann.