Gefur Magasin falleinkunn

Jóhannes Jónsson í Bónus gefur þjónustunni í Magasin du Nord, sem Baugur keypti nýverið, falleinkun í viðtali við Jótlandspóstinn í gær. Þar lýsir Jóhannes því að hann hafi verið staddur í Kaupmannahöfn og vantað ný föt, og auðvitað farið í Magasin. Þar kom hann inn í karlmannafatadeildina rétt upp úr hálf tíu á morgni og bjóst við góðri þjónustu, enda utan háannatíma, en annað hafi orðið uppi á teningnum. Hann hafi gengið þar um lengi án þess að neinn yrti á sig. Hann segist hafa orðið svekktur og bætti því við að það væri alveg sama hvernig sjoppu maður keypti, hún væri einskis virði ef viðskiptavinirnir væru ekki ánægðir.