Ungmenni hugsi um bágstadda

Hvernig manneskja ert þú? Hjálparstarf kirkjunnar spyr íslensk ungmenni að þessu til að minna á að úti í löndum sé fólk síður aflögufært en hér. Þetta gerir stofnunin með svokölluðu Tilfinningakorti. Með Tilfinningakortinu sem dreift verður í alla framhalds- og háskóla landsins auk kaffihúsa vill Hjálparstarf kirkjunnar vekja ungt fólk til umhugsunar um hvað því líði vel á Íslandi og eigi auðvelt með að styrkja bágstadda annars staðar í heiminum. Anna Ólafsdóttir hjá Hjálpastofnun kirkjunnar segir að stofnunin vilji að ungmenni kynni sér það ójafnvægi sem ríki milli ríkra og fátækra í heiminum og taki afstöðu í málinu og vilji vinna að því að gera heiminn betri. Öðrum megin á Tilfinningakortinu er andlit sem hefur að geyma ýmsa mannlega eiginleika eins og græðgi, samúð ást og reiði og það á að hvetja ungt fólk til að velta fyrir sér hvernig það vilji vera. Hinum megin á kortinu eru daglegir hlutir ungmenna settir í samhengi, svo sem bíóferð eða skyndibitakaup, og þannig eru þeim sýnt hvað sé hægt að gera við andvirði þessara hluta. Á kortinu er kynnt spánný söfnunarleið sem ekki hefur verið notuð áður. Anna segir að í fyrsta sinn sé hægt að leggja fram fé með því að senda SMS-skilaboð. Fólk geti sent skilaboðin gefa í númerið 1900 og þá gefi það 299 krónur. Þessi söfnunarleið var valin þar sem ungt fólk notar farsíma mjög mikið, en símafyrirtækin taka 20 prósent af söfnunarfénu. 80 prósent fara því í verkefni Hjálparstofnunar kirkjunnar en Anna segir að meginmarkmiðið sé þó að hvetja ungt fólk til að hugsa um stöðu sína gagnvart umheiminum