Skelfilegt að horfa á brunann

"Skelfilegt er að horfa á vinnustað sinn brenna," sagði Loftur Guðmundsson starfsmaður fiskimjölsverksmiðjunnar Fiskimjöls og lýsis. Hann stóð utan við húsið í gær og fylgdist með slökkvistarfi rúmlega þrjátíu manna úr þremur slökkviliðum. Sprenging varð í katli við mjölþurrkara í verksmiðjunni rétt fyrir hálf fjögur í gær. Um tíu mínútum síðar urðu starfsmennirnir átta eldsins varir. "Ég veit ekki hvað gerðist. Ég sá að eldur var kominn í þakið og það var ekkert annað að gera en að forða sér," segir Loftur. Unnið hefur verið á sólarhringsvöktum í verksmiðjunni síðustu daga. Loftur segir þá hafa verið í stjórnstöð verksmiðjunnar að ljúka loðnubræðslu þegar eldurinn kom upp. Engan hafi sakað. Slökkvistarf gekk erfiðlega að sögn Ásmundar Jónssonar slökkvistjóra Slökkviliðs Grindavíkur. Slökkviliðið hafi þurft að einblína á að eldurinn kæmist ekki í sýru, plastkúta og gufuketil til að fyrirbyggja sprengihættu: "Hefði eldurinn borist í efnin hefði orðið svakaleg sprenging." Ásmundur segir að strax og þeir sáu umfang brunans hafi verið kallað eftir aðstoð Brunavarna Suðurnesja og slökkviliðs Varnarliðsins. Björgunarsveit og lögregla komu einnig á staðinn. Þorsteinn Már Baldvinsson, forstjóri Samherja, segir óljóst hvert tjónið af völdum eldsins sé og of snemmt að segja til um hvort verksmiðjan verði endurbyggð. Lán sé að engar birgðir hafi tapast í eldinum. Engin frekari vinnsla verði í húsinu þessa vertíð. Eldsupptök eru ókunn en ekki er talið að um íkveikju hafi verið að ræða. Lögreglan í Keflavík rannsakar málið í dag.