Tvöföldun Reykjanesbrautar fagnað

Suðurnesjamenn fögnuðu yfirlýsingu samgönguráðherra á borgarafundi í Stapa í gærkvöld um að annar áfangi tvöföldunar Reykjanesbrautar yrði boðinn út í einu lagi í vor. Ekki er ólíklegt að þeim áfanga ljúki fyrir árslok næsta árs. Áhugahópur um örugga Reykjanesbraut hélt borgarafund númer tvö í gærkvöldi en sá fyrri var haldinn fyrir rétt rúmum fjórum árum og má segja að hafi verið upphafið að alvöru baráttu Suðurnesjamanna fyrir tvöföldun brautarinnar. Sturla Böðvarsson samgönguráðherra var fyrsti ræðumaður kvöldsins og er óhætt að segja að hann  hafi nánast „klárað“ fundinn á fyrstu mínútunum með splunkunýrri yfirlýsingu um að seinni áfangi tvöföldunar, 10,5 kílómetra langur kafli austan við Voga til Njarðvíkur, yrði boðinn út í einu lagi í vor. Ráðherra fékk afhenta skóflu á borgarafundinum árið 2001 og var hún notuð við fyrstu skóflustungu að fyrri áfanga tvöföldunarinnar. Og eftir yfirlýsinguna í gær sagði ráðherra: „Takið frá skófluna góðu. Það verður fljótlega þörf fyrir hana.“ Stuttu seinna var skóflan afhent Sturlu. Um 500 manns mættu á fundinn og kvað við mikill fögnuður eftir yfirlýsingu ráðherra. Þingmenn frá öllum flokkum fluttu stutt ávörp og voru allir sem einn mjög glaðir með ákvörðun ráðherra og studdu hana.  Sturla segir að gert hafi verið ráð fyrir að taka breikkunina í fleiri áföngum en rétt sé að gera þetta með þessum hætti með hliðsjón af ástandinu á verktakamarkaði. Þá komi  líka í ljós heildarverð verksins og í framhaldinu sé hægt að ákvarða framkvæmdatímann. Steinþór Jónsson, talsmaður áhugahópsins, segir að ekki hafi verið vitað fyrir fundinn að svona ákeðin afstaða væri fyrirliggjandi í málinu. Allir Suðurnesjamenn fagni hins vegar niðurstöðunni. Steinþór sér fyrir sér að verkið klárist á næsta ári.