Tvöföldunin boðin út á árinu?

Búist er við að samgönguráðherra tilkynni á fundi í Njarðvík í kvöld að næsti áfangi í tvöföldun Reykjanesbrautar verði boðinn út á þessu ári. Fjögur ár eru frá því áhugahópur um tvöföldun Reykjanesbrautar fyllti félagsheimilið Stapa í Njarðvík til að þrýsta á um að framkvæmdir hæfust sem fyrst. Og enn er þrýst á stjórnmálamenn. Í kvöld er aftur stefnt að því að fylla Stapann en að þessu sinni til að þrýsta á að haldið verði áfram að breikka brautina. Fundarboðendur segjast ekki vilja bíða til ársins 2010 eins og vegaáætlun gerir ráð fyrir. Samgönguráðherrann, Sturla Böðvarsson, er kynntur sem aðalræðumaður á fundinum í kvöld en það var einmitt hann sem síðastliðið sumar hafði þann heiður að opna fyrsta áfanga tvöfaldrar Reykjanesbrautar. Upphaflega átti þetta að vera átta kílómetra langur kafli en eftir þrýsting Suðurnesjamanna var verkið stækkað og endaði með tólf kílómetra lengingu. Leiðin milli Hafnarfjarðar og Njarðvíkur er 24 kílómetrar og því eru eftir tólf kílómetrar. Samgönguráðherranum er vandi á höndum því þessa dagana er verkefni hans að skera niður 1900 milljónir af vegaáætlun þessa árs og 2000 milljónir af vegaáætlun næsta árs. Engu að síður segja heimildir Stöðvar 2 að hann muni gefa yfirlýsingu í kvöld þess efnis að næsti áfangi tvöföldunar Reykjanesbrautar verði boðinn út á þessu ári. Líklegt er að sá kafli verði sunnanmegin, frá Vatnsleysuströnd í átt að Njarðvík.