Tvöföldun verði lokið hið fyrsta

Borgarafundur verður haldinn í Stapanum í Reykjanesbæ í kvöld þar sem þess verður krafist að lokið verði við breikkun Reykjanesbrautar hið fyrsta. Fyrri áfanga við tvöföldun vegarins lauk í júlí síðastliðnum og síðari hlutinn er ekki á vegaáætlun fyrr en árið 2010. Áhugamannahópur undir forystu Steinþórs Jónssonar telur hins vegar óþarft að bíða svo lengi, allar forsendur séu fyrir því að ljúka þessu fyrr enda sé hægt að gera það á nokkrum mánuðum og verðlag sé hagstætt. Steinþór segir mikla ánægju vera með þá tvöföldun sem þegar sé lokið og að ekkert alvarlegt slys hafi orðið á Reykjanesbrautinni sl. sjö mánuði. „Það er töluverður tími miðað við tölfræði brautarinnar,“ segir Steinþór og tekur fram að hópur hans hefði átt um þetta gott samstarf, bæði við Sturlu Böðvarsson samgönguráðherra og þingmenn kjördæmisins. Á borgarafundi sem haldinn var um þetta mál árið 2001 mættu yfir eitt þúsund manns. Borgarafundurinn verður haldinn í Stapa og hefst klukkan átta í kvöld.