Tugþúsundum bolla sporðrennt í dag

Búast má við að einhverjir tugir þúsunda af bollum renni ofan í landsmenn í dag. Bakarar landsins hafa staðið sveittir við ofna sína frá því fyrir helgi við að baka bollur, enda tóku margir forskot á sæluna og sporðrenndu nokkrum slíkum. Víglundur Jónsson hjá Árbæjarbakaríi segir að hann búist við að þeir muni baka um 8500 bollur á þessari vertíð og að yfir landið skipti fjöldinn sjálfsagt einhverjum tugum þúsunda. Og hvað er svo í blessuðum bollunum? Jú, í algengri tegund eru egg, vatn, ger, sykur, súkkulaðið, rjómi og smjör, mikið af smjöri. Víglundur segir að bollurnar séu afskaplega hollar svona einu sinni á ári, fyrir þá sem hreyfi sig reglulega. Og verðið á dýrðinni, jú bollan kostar um 230 krónur.