Segja úrskurð staðfesta grun

Ættingjar manns á níræðisaldri, sem lést í kjölfar byltu á Hrafnistu, segja bráðabirgðaúrskurð Landlæknis staðfesta grun sinn um að meðferð og aðhlynning á dvalarheimilinu hafi ekki verið með eðlilegum hætti. Ættingjarnir sætta sig ekki við ósamræmi í vitnisburði starfsmanna og læknis Hrafnistu. Samkvæmt bráðabirgðaúrskurði Landlæknisembættisins fékk Ólafur Gunnarsson, sem var 85 ára þegar hann lést í kjölfar byltu á Hrafnistu, ekki þá meðferð sem ætlast hefði mátt til af starfsfólki dvalarheimilisins, en níu klukkustundir liðu frá því Ólafur féll í gólfið í borðsal heimilisins þar til hann var fluttur á sjúkrahús. Sex dögum síðar lést hann án þess að komast nokkurn tímann til meðvitundar. Forsvarsmenn Hrafnistu segja að mistök hafi átt sér stað og undir það tekur Landlæknisembættið, en ekki var farið eftir vinnureglum innanhúss. Sveinn H. Skúlason, forstjóri Hrafnistu, segir að niðurstaða landlæknis hafi verið mjög í takt við það sem fram hafi komið í skýrslu stofnunarinnar og hann reikni ekki með að gerðar verði athugasemdir við hana. Sveinn segir að þegar hafi verið brugðist við með úrbótum. Skerpt hafi verið á vinnureglum og farið yfir þær með starfsfólki. Í framhaldinu hljóti það svo að vera í höndum stjórnenda vistheimilisins að gera öllum ljóst að fylgja þar vinnureglum. Það sé bara einu sinni svo að þó að starfsmaður segist hafa gert ákveðinn hlut hafi hann ekki gerst nema það sé skráð. Ættingjar Ólafs heitins segja bráðabirgðaúrskurð landlæknis staðfesta grun þeirra um að ekki hafi verið farið eftir starfsreglum og meðferð á Hrafnistu hafi ekki verið með eðlilegum hætti. Sonur Ólafs segir hins vegar að aðstandendur sætti sig ekki við ósamræmi sem sé að finna í vitnisburði starfsfólks og læknis Hrafnistu. Í úrskurði Landlæknisembættisins er haft eftir starfsfólkinu að eftir byltuna hafi Ólafur verið vankaður og hann hafi ekki svarað eða getað tjáð sig eðlilega. Vakthafandi læknir á Hrafnistu segir hins vegar að þegar hann hafi skoðað Ólaf hafi hann legið í rúminu með fullri meðvitund, svarað sér og hreyft alla útlimi og enga áverka hafi verið að sjá. Þetta vilja ættingjarnir láta skoða betur, ekki síst þar skrásetningar hafi verið með ófullnægjandi hætti. Ættingjarnir fóru á sínum tíma fram á lögreglurannsókn vegna atviksins og er það enn til skoðunar hjá lögregluembættinu.