Líka í móðurhlutverki

Vladimir Stanovko, rússneski læknirinn á Kárahnjúkum, segir að heimsóknirnar hafi verið svona margar vegna aðstæðna á staðnum, kulda og myrkurs, og á máli hans má skilja að verkamenn hafi ekki bara leitað sér læknis vegna slysa og sjúkdóma heldur hafi erlendu verkamennirnir komið "til að gráta", eins og hann segir glettnislega. Starfsfólk heilbrigðisstöðvarinnar hefur því verið í nokkurs konar móðurhlutverki auk lækninga- og hjúkrunarhlutverksins, hlustað á menn frá Suður-Evrópu og veitt þeim stuðning og uppörvun. Þetta telur Vladimir að hafi þó lagast mikið upp á síðkastið enda hafi fólk verið ráðið í samræmi við aðstæður. Heilsugæsluliðið á Kárahnjúkum skoðar alla starfsmenn sem koma frá löndum utan Evrópska efnahagssvæðisins og segja læknarnir að starfsmennirnir séu yfirleitt við góða heilsu. Athugasemdir hafi aðeins verið gerðar tvisvar, einu sinni hafi fundist fæðingargalli hjá manni og einu sinni hafi fundist berklar. Allir geti starfað á Kárahnjúkum nema hjartasjúklingar, lungnasjúklingar og menn með liðasjúkdóma. "Ég átti von á þunglyndi, kvíða og þess háttar einkennum hjá mönnunum," segir Þorsteinn, "en það fólk fer fljótt. Mennirnir reykja bara of mikið." Heilsugæslustöðin á Kárahnjúkum hefur sólarhringsvakt og þangað koma menn í læknisskoðun, fá lyf og geta fengið fyrstu hjálp ef þörf krefur. Á nóttunni eru menn kallaðir út eftir þörfum. Ef lyfin eru ekki til á staðnum er sendur lyfseðill til Egilsstaða og þaðan fæst lyfið samdægurs. Sautján menn starfa nú á heilsugæslustöðinni. Þorsteinn Njálsson læknir er fulltrúi Heilbrigðisstofnunar Austurlands og hann sinnir yfirstjórn. Næstur honum er rússneskur læknir, Vladimir Stanovko. Til viðbótar eru svo hjúkrunarfræðingar, bæði íslenskir og erlendir, og sjúkraflutningamenn. Bílaflotinn er ekki af lakara taginu og sjúkrabílarnir geta tekist á við erfiðustu aðstæður í veðri og færð á hálendinu.