Hampiðjan til Litháens

Hundrað störf hafa verið lögð af í Reykjavík við flutning verksmiðju Hampiðjunnar til Litháens. Þetta er tæpur fjórðungur áætlaðra starfa í álverinu á Reyðarfirði. Hampiðjan er rótgróið fyrirtæki, komið á áttræðisaldur og framleiðir meðal annars net og kaðla. Um árabil hefur aðalverksmiðjan verið í 10 þúsund fermetra húsi við Bíldshöfða í Reykjavík en framleiðslan hefur verið seld um víða veröld. Eitt sinn iðaði það allt af lífi og vélarnar gengu en nú ríkir þögnin ein. Og innan skamms verður húsið tómt því Hampiðjuverksmiðjan er nú í Litháen. Með því að stór hluti neta- og kaðlagerðar Hampiðjunnar fer úr landi hverfa eitt hundrað störf og reyndar fækkar um 60 störf hjá fyrirtækinu í Portúgal einnig. Nefnt hefur verið að um 450 manns muni vinna í nýju álveri á Reyðarfirði þegar það verður komið í rekstur og er því þessi fækkun starfa í Reykjavík tæpur fjórðungur af því. Fyrirtækið hefur keypt verksmiðju í Litháen þar sem framleiðslan verður en þar í landi er launakostnaður aðeins brot af því sem hér er, auk þess sem allur kostnaður þar í landi er mun lægri en á Íslandi. Yfirstjórn fyrirtækisins verður áfram hér á landi en auk þess á Hampiðjan netaverkstæði um allt landi. Búið er að selja fasteignir fyrirtækisins í Reykjavík, húsnæði við Súðarvog og einnig stórhýsið við Bíldshöfða en fyrir þær fengust 730 milljónir króna. Meðal þess sem verður í húsinu við Bíldshöfða verður bílavarahlutafyrirtækið Bílanaust.