Þrettán ungar seldust strax

Ung kona á Álftanesi heldur óvenjuleg gæludýr, fimm fullorðnar rottur. Tvær þeirra felldu hugi saman og í fyllingu tímans fæddust 13 ungar. Þeir eru nýbúnir að opna augun og rétt svo farnir taka sín fyrstu skref í heiminum. Kristbjörg Sara Thorarensen, sem á rotturnar, flutti þær inn frá Danmörku í ágúst. Þær eru úr góðri ræktun, en víða um lönd hafa rottur lengi verið ræktaðar sem gæludýr og mikið vandað til þess. Gælurotturnar hafa þróast út frá þeim villtu í tímans rás og stofnarnir eru nú orðnir gjörólíkir. "Það er búið að rækta ýmsar tilhneigingar villtra dýra, svo sem grimmdina, úr þeim," sagði Kristbjörg Sara. "Það er margt svipað með þeim og hundum og annað sem svipar til katta. Þær þurfa til dæmis að kynnast fólki og samþykkja það áður en hægt er að taka þær upp. Þá þefa þær af viðkomandi og viðurkenna hann. Ég er með þær allar á gólfinu hjá mér núna. Ef ég kalla í þær þá koma þær þjótandi. Þær eru miklar félagsverur, skemmtilegar og forvitnar." Kristbjörg Sara sagði að það þurfi að gefa rottunum góðan tíma á degi hverjum. "Þær eru svo rosalega klárar, að þær þurfa talsverða örvun. Þess vegna er gott að hafa tvær saman, af sama kyni auðvitað, svo þær fái félagsskap hvor af annarri. Ég hleypi þeim út í klukkutíma, einn og hálfan á dag. Svo eru þær hlaupandi innan á mér og leika sér þegar ég er að horfa á sjónvarp." Rottukallarnir geta orðið um 600 grömm að þyngd, en kerlingarnar nær helmingi léttari. Rotturnar hafa skýra goggunarröð í sínum hópi. Kristbjörg Sara sagði það greinilegt hvaða rotta væri "svölust" og hefði forystuna fyrir hópnum. Þá væru rotturnar mjög ólíkar í sér. Hún sagði mikla eftirspurn eftir rottuungum, sem hún kvaðst selja á 2 - 3000 krónur stykkið. Hún hefði getað selt mun fleiri en þessa þrettán.