Ósamræmi í vinnubrögðum sýslumanna

Forstjóri Vinnumálastofnunar segir að yfirvöld hafi ekki haft ráðrúm til að hugsa til enda viðbrögð við að útlendingar starfi hér á landi án leyfis. Sýslumenn hafa sinn háttinn á eftir því hvort þeir starfa á Vestur- eða Austurlandi. Engar samræmdar reglur eru til um það hvernig taka skuli á málum erlendra verkamanna sem ráðnir eru með þjónustusamningi í gegnum starfsmannaleigur og hafa ekki atvinnuleyfi. Eins og fram hefur komið í fréttum Stöðvar 2 var vinna sjö Letta sem störfuðu í Ólafsvík stöðvuð þar sem þeir reyndust ekki hafa atvinnuleyfi. Austur á landi hafa fjórir lettneskir verkamenn í sömu stöðu lengi fengið að vinna óáreittir. Finnbjörn Hermannsson, formaður Samiðnar, gagnrýnir þetta harðlega. Hann segir þetta farið að hafa áhrif á félagslegu kjör síns fólks, m.a. hvað varðar atvinnuöryggi. Því vill hann að erlendir starfsmenn falli undir íslensk lög og kjarasamninga svo þeir séu ekki með félagsleg undirboð. Gissur Pétursson, forstjóri Vinnumálastofnunar, segir að ekkert óeðlilegt sé að stjórnvöld þurfi tíma til umhugsunar þegar svona ný vandamál blasi við. Samkvæmt Vinnumálastofnun gilda þjónustusamningar ekki fyrir venjulega iðnaðarmenn og án atvinnuleyfis hafa þeir ekki heimild til að vinna. Gissur segir að dæmi séu um svokallaða gerviverktaka sem ruddu sér til rúms fyrir nokkrum árum. „Henni (starfseminni) var svo að segja útrýmt með samræmdum vinnubrögðum og ég hef enga trú á öðru en að þetta ættum við að geta gert hvað þetta varðar,“ segir Gissur.