Erlent vinnuafl notað í hagstjórn

Fyrrverandi forstjóri Útlendingastofnunar segir Íslendinga ekki standa sig nógu vel í málefnum innflytjenda. Hann segir erlent vinnuafl á vissan hátt notað sem hagstjórnartæki. Georg Kr. Lárusson, fyrrverandi forstjóri Útlendingastofnunar, var meðal framsögumanna um málefni innflytjenda í ReykjavíkurAkademíunni í dag. Í máli hans kom fram að Íslendingar standa sig ekki nógu vel í þessum málaflokki. Dómsmálaráðherra hefði markað ákveðna stefnu með nýjum útlendingalögum en það væri ekki nóg. Önnur stjórnvöld þyrftu að koma þar að og sömuleiðis allt þjóðfélagið til þess að hægt væri að marka mætti málaflokkinn skýrar og betur og búa betur að því fólk sem kæmi inn í landið. Eins og fram kom hjá Georg þarf allt þjóðfélagið að koma að þessum málaflokki sem og öll ráðuneyti og heildarstefna þarf að liggja fyrir. Sú stefna hafi verið mörkuð hjá sumum sveitarfélögum og einstaka fyrirtækjum. Georg segir enn fremur að sú stefna sem dómsmálaráðuneytið hafi markað sé góð í dag. Hún sé alltaf umdeilanleg en hins vegar sé um ný lög að ræða sem alltaf þurfi að vera í endurskoðun. Ekki sé verið að setja lög sem muni gilda um aldur og ævi því málaflokkurinn þróist mjög hratt, t.a.m. hafi orðið gífurlegar breytingar í honum á síðustu tíu árum. Menn þurfi því að vera vel á verði og huga að öllu sem betur megi fara og horfa þá til landanna í kringum okkur. Georg segir Ísland opið land fyrir útlendinga og mun opnara en mörg önnur. Hann segir að á vissan hátt sé erlent vinnuafl notað sem hagstjórnartæki. Skortur sé á vinnuafli og því hafi verið leitað til útlanda eftir vinnuafli sem hafi auðvitað áhrif á hagstjórnina í landinu. Vitað sé að flestallir útlendingar sem komi til landsins veljist til láglaunastarfa og það sé ekki af ástæðulausu. Um sé að ræða störf sem Íslendingar vilji ekki sinna vegna þess að þau séu láglaunastörf. Þetta marki sín spor í íslenskt hagkerfi.