Þúsundir manna flýja fellibyli

Fellibylurinn Emily skall á Yucatan-skaga í Mexíkó í fyrrinótt og skildi eftir sig slóð eyðileggingar. Ekki hafði þó frést í gær af neinum dauðsföllum eða alvarlegum meiðslum af völdum veðurofsans. Þúsundir heima- og ferðamanna leituðu skjóls í neyðarskýlum sem komið hafði verið upp í skólastofum og danssölum. Yfir hálf milljón manna flúði heimili sín á suðausturströnd Kína í gær þegar fellibylurinn Haitang, sem gengið hafði yfir Taívan, stefndi inn á meginlandið. "Það versta er yfirstaðið," sagði Felix Gonzalez, fylkisstjóri Quintana-Roo-fylkis í Mexíkó, en það nær meðal annars yfir borgirnar Cancun og Playa del Carmen á Yucatan-skaga. Þúsundir heimamanna og erlendra ferðamanna gistu í neyðarskýlum í danssölum hótela og skólastofum í borgum og bæjum á austurströnd Yucatan, en þar eru vinsælir ferðamannastaðir. Einn bæjanna á þessu svæði er Merída, þar sem hópur íslenskra ungmenna tók þátt í ólympíumótinu í stærðfræði. Vindhraðinn í hviðunum sem fylgdu fellibylnum var allt að 215 km/klst, en þar með telst bylurinn vera af styrkleikastiginu 4. Þegar bylurinn hafði gengið yfir Yucatan hafði dregið heldur úr vindhæðinni og taldist Emily því vera komin niður í byl af styrkleikastiginu 2 þegar hann hélt áfram ferð sinni út á Mexíkóflóa. Þó var reiknað með að Emily færðist aftur í aukana yfir heitum sjó og yrði aftur orðin að skaðræðisfellibyl er hann gengi á land við vestanverðan Mexíkóflóa í kvöld eða nótt. Íbúar Fujian-héraðs í Kína biðu þess að Haitang-bylurinn skylli á heimilum þeirra. 17.000 bátar sem gerðir eru út frá Fujian-héraði voru við festar í von um að þeir stæðu af sér óveðrið. Að sögn héraðsyfirvalda höfðu í gær um 540.000 manns, mikið til fiskimenn og starfsfólk fiskiræktarstöðva og fjölskyldur þeirra, verið fluttir frá ströndinni í neyðarskýli innar í landi.