Taka Aðalstræti 10 í sína vörslu

Reykjavíkurborg og Minjavernd hf. hafa gert með sér samning um að félagið taki húsið Aðalstræti 10 í vörslu til 35 ára. Markmið samningsins er að húsið verði endurbyggt á þann hátt sem því hæfir sem einu elsta húsi í Reykjavík. Þar með verður endurgerð húsa við Aðalstræti lokið. Í samningnum felst að Minjavernd tekur við húsinu í því ásigkomulagi sem það er í og endurbyggir það. Minjavernd verður eigandi að öllum endurbótum sem gerðar verða á húsinu til loka samningstíma. Að þeim tíma loknum hefur Reykjavíkurborg val um að framlengja samningstímann um 15 ár eða endurgreiða félaginu hluta kostnaðar við endurgerðina, alls 30 milljónir króna. Við endurgerðina verður fullt tillit tekið til þess að húsið er friðlýst samkvæmt 6. grein laga um húsafriðun. Gert er ráð fyrir að endurbótum verði lokið árið 2006. Samningurinn kveður jafnframt á um að Minjavernd verði heimilt að reisa byggingu aftan við húsið í samræmi við samþykkt deiliskipulag og tengja það því, kjósi félagið svo. Minjavernd verður eigandi þess húss. Húsið við Aðalstræti 10 er elsta húsið í Kvosinni og er eitt eftir af þeim húsum sem reist voru fyrir starfsemi Innréttinganna sem hófu starfsemi sína í Reykjavík 1752. Þær hafa verið kenndar við Skúla Magnússon landfógeta sem nefndur er faðir Reykjavíkur. Stofnun Innréttinganna var tilraun til að koma á fót iðnaði á Íslandi. Við þá götu sem seinna var nefnd Aðalstræti voru reist hús fyrir vefsmiðjur Innréttinganna og var það fyrsti vísir að þorpi í Reykjavík. Árið 1755 voru átta hús sem risin voru á vegum Innréttinganna virt en einnig kemur þar fram að gert hafi verið við gömlu bæjarhúsin í Reykjavík og virðast þau hafa verið nýtt á vegum verksmiðjanna. Húsið Aðalstræti 10 er þó talið byggt aðeins síðar, árið 1762, og hýsti í upphafi ullargeymslu og skrifstofu og íbúð bókhaldara Innréttinganna.