Gámar fuku fyrir austan

Mildi þykir að enginn skyldi vera á ferðinni í stefnu tveggja gáma sem flugu í loftköstum allt að kílómeters leið í vindhviðum á Norðfirði í morgun. Hvor gámur er tuttugu feta langur og lenti annar á gamalli dráttarvél sem verið er að gera upp og braut hana í frumeinidir, eins og lögreglumaður orðaði það. Hinn skall á vatnsveituhúsinu sem var timburhús á steyptum grunni og er það ónýtt. Af þeim sökum er vatnsskömmtun í hluta bæjarins. Þá brotnaði loftskeytamastur í útjaðri bæjarins en engan sakaði. Á Eskifirði voru björgunarmenn kallaðir út til að aðstoða sjómenn á loðnuskipinu Júpíter við að hemja það við bryggjuna og tókst það. Þá fuku járnplötur af nokkrum húsþökum áður en björgunarsveitarmenn náðu að hemja það en ekki er vitað um stórfellt tjón af þessum völdum. Engan sakaði á Eskifirði frekar en á Norðfirði, enda héldu margir kyrru fyrir heima hjá sér en nú er heldur farið að lægja. Loðnuflotinn sem var að veiðum fyrir austan liggur ýmist í vari inni á fjörðum eða við bryggjur og er ekki vitað til þess að neitt óhapp hafi orðið um borð í þeim þrátt fyrir veðurofsann.