Fyrirtækinu stolið á mínútu

Ljósmyndari við Laugaveginn brá sér á salernið á föstudag illu heilli. Þegar hann sneri aftur innan við mínútu síðar var fyrirtækið horfið. Erling Ó. Aðalsteinsson ljósmyndari segir að hann hafi nýlokið við að taka mynd af fjölskyldu sem hafi verið farin út. Hann hafi sest við tölvuna í kjölfarið til að vinna myndir og prenta út skjal. Svo hafi hann skroppið fram á salerni og verið þar hálfa til eina mínútu en þegar hann hafi komið til baka hafi tölvan verið horfin. Meðan Erling dvaldist á salerninu hafði óboðinn gestur laumað sér upp stigann og inn á ljósmyndastofuna. Erling segir að þjófurinn eða þjófarnir hafi haft fyrir því að aftengja tölvuna og taka prentarann og myndavélina og straumbreytinn en þeir hafi skilið eftir starfræna myndavél sem sé reyndar dýrari en tölvan. Í tölvunni var fjöldi ljósmynda frá síðustu mánuðum en afrit var til af hluta safnsins. Erling segir að segja megi að fyrirtækið hafi verið í tölvunni, hann hafi myndað á filmur en sé að skipta yfir í stafræna tækni og hafi verið með hana í talsverðan tíma. Erling er gamall langhlaupari og reyndi að hlaupa út á götu og elta uppi þjófinn en án árangurs. Þegar ljósmyndastofan hóf starfsemi sína fyrir fimm árum braust þjófur inn í íbúðina beint á móti og mætti Erling á útleið með fangið fullt af skartgripum. Erling náði að hlaupa þjófinn uppi og yfirbuga hann við danska sendiráðið. En þessi saga endar ekki jafn vel. Erling segir að fyrstu viðbrögð sín við stuldinum á ljósmyndastofunni hafi verið að stökkva út og hlaupa upp Klapparstíginn. Honum hafi ekki dottið í hug að einhver með tölvu myndi labba upp eða niður Laugaveginn og því hafi hann kíkt í nokkur húsasund og á nokkra vafasama bari en ekkert hafi verið að finna þar.