Gert klárt fyrir Metallica

Nú styttist í að Metallica komi hingað til lands og ylji rokkþyrstum aðdáendum með nærveru sinni. Fáir gera sér grein fyrir þeirri gríðarlegu vinnu sem liggur að baki tónleikunum og hafði Fréttablaðið samband við Halldór Kvaran, framkvæmdastjóra tónleikanna, til að athuga hvort undirbúngsvinnan væri langt á veg komin. "Þetta gengur allt samkvæmt áætlun" sagði Halldór. "Uppsetning sviðsins er nánast fullunnin, við erum hálfnuð í að klæða gluggana og það styttist í að hingað komi fraktvél með hljóð- og ljósakerfi fyrir tónleikana". 15 þúsund miðar eru nú þegar seldir en RR ehf., sem stendur á bak við komu Metallica, fékk leyfi til að bæta þrjú þúsund miðum við. "Ef þeir seljast ekki allir í verslunum Og Vodafone fyrir tónleikana verða þeir til sölu við innganginn." Tónleikarnir eru á sunnudaginn og mun Fréttablaðið fylgja undirbúningnum eftir með daglegri umfjöllun.