Torri Edwards í tveggja ára bann

Heimsmeistarinn í 100 metra hlaupi kvenna, Torri Edwards, hefur hlotið tveggja ára keppnisbann eftir að hún féll á lyfjaprófi. Edwards hafði áður verið valin í Bandaríska liðið á Ólympíuleikana. Edwards sem er 27 ára, hlaut heimsmeistaratitilinn eftir að samlanda hennar Kelli White hlaut tveggja ára keppnisbann þegar hún viðurkenndi að hafa tekið inn nokkur ólögleg lyf. Edwards heldur því fram að hún hafi fengið þrúgusykurstöflur hjá sjúkraþjálfara sínum og hafi ekki vitað að þær innihéldu ólögleg lyf. Eins dauði er annars brauð og í staðin fyrir Edwards mun nú Gail Devers keppa fyrir hönd Bandaríkjanna í 100 metra hlaupi. Devers sem er 37 ára, hlaut gullverðlaun í þeirri grein árin 1992 og 1996. Hún hefur einnig tryggt sér keppnisrétt í 100 metra grindahlaupi sem hún er tvöfaldur heimsmeistari í. Hún á þó enn eftir að ná þeim árangri að sigra í greininni á Ólympíuleikunum. Þá hafa þrír rússneskir íþróttamenn fallið á lyfjaprófi og fá því að öllum líkindum ekki að taka þátt á Ólympíuleikunum. Ekki hefur verið gefið upp hverjir þessir íþróttamenn eru og er beðið eftir staðfestingu annars prófs. Yfirvöld í Rússlandi höfðu tilkynnt í júní að allir íþróttamenn sem notað hefðu ólögleg lyf, yrðu reknir úr liðinu.