Hart sótt að Arafat

Staða Jasser Arafats, leiðtoga Palestínumanna, er erfiðari en hún hefur verið um margra ára skeið. Mikillar óánægju gætir með spillingu sem þykir hafa vaðið uppi innan heimastjórnarinnar auk þess sem hópar Palestínumanna keppast nú um að tryggja sér áhrif í aðdraganda þess að Ísraelar draga sig á brott frá Gazasvæðinu. Palestínskir vígamenn réðust á stjórnarbyggingu í Gaza í gær til að mótmæla skipan náfrænda Arafats í embætti yfirmanns öryggisstofnana. Þá hafa skipulagsbreytingar á öryggissveitum sem Arafat tilkynnti á laugardag. Þær eru sagðar engu breyta þar sem öryggissveitirnar heyri eftir sem áður undir Arafat og að ekkert sé gert til að draga úr spillingu. Mikil mótmælaalda reis um helgina. Í gær komu hundruð manna saman á götum Gazaborgar, margir vopnaðir, til að mótmæla skipun Moussa Arafat. Tugir grímuklæddra vígamanna gegnu um Nusseirat flóttamannabúðirnar og kölluðu "Nei við Moussa Arafat, já við umbótum". Fjölmenn mótmæli áttu sér einnig stað á laugardag. Mótmælin gegn Arafat og stjórn hans eru þau mestu um rúmlega eins árs skeið. Í fyrra urðu mótmæli gegn spillingu í heimastjórninni svo mikil að Arafat varð að lofa umbótum og skipa nýja ríkisstjórn undir stjórn forsætisráðherra. Sú staða var þá tekin upp í fyrsta sinn í palestínsku heimastjórninni. Fyrsti maðurinn til að gegna henni, Mahmoud Abbas, sat þó aðeins í fjóra mánuði áður en hann sagði af sér. Abbas, líkt og Ahmed Qureia, var ósáttur við að Arafat gæfi ekki nógu mikið eftir af völdum sínum. Qureia sagði af sér í fyrradag en Arafat neitar að taka afsagnarbeiðnina gilda. Heimastjórnin á að funda í dag og þar gæti framtíð Qureia ráðist. Gomma Ghali, yfirmaður strandgæslunnar, sem hefur verið tryggur stuðningsmaður Arafats, sagði af sér í gær í mótmælaskyni við skipun Moussa Arafats.