Treysta Blair ekki í annað stríð

Meirihluti breskra kjósenda treystir Tony Blair forsætisráðherra ekki lengur til að leiða land sitt í stríð samkvæmt niðurstöðum skoðanakönnunar sem birtist í Sunday Times. 57 prósent segjast ekki myndu treysta Blair ef kæmi til annars stríðs og aðeins 31 prósent sagðist treysta honum til að leiða landið í öðru stríði. Nær helmingur, eða 46 prósent, sagðist telja að Blair hefði vísvitandi beitt blekkingum í tengslum við innrásina í Írak en litlu færri, eða 43 prósent, telja að forsætisráðherrann hafi trúað því sem hann sagði. Þrír af hverjum fimm vilja að Blair biðjist afsökunar, fimmtungur telur enga þörf á því og fimmtungur hefur enga skoðun á því eða gefur hana ekki upp.