Sendimaður í gíslingu

Vígamenn tóku egypskan sendimann í gíslingu og kröfðust þess að egypsk stjórnvöld lýstu því yfir að þau myndu ekki senda herlið til Íraks til að styðja bráðabirgðastjórnina. Gíslatakan er áfall fyrir tilraunir Iyad Allawi, forsætisráðherra Íraks, sem vill fá hersveitir frá araba- og múslimaríkjum til að verja þá sem eru í Írak á vegum Sameinuðu þjóðanna. Á fimmtudag ræddi Allawi við Hosni Mubarak í von um að Egyptar sendi herlið til Íraks í þessum tilgangi. Rúmlega 70 útlendingar hafa verið teknir í gíslingu síðustu mánuði. Sjö þeirra eru í haldi vígamanna sem krefjast þess að kúveiskt fyrirtæki sem þeir vinna fyrir greiði fjölskyldum þeirra sem féllu fyrir hendi Bandaríkjamanna í Fallujah bætur.