Borgarastyrjöld vofir yfir

Borgarastyrjöld er yfirvofandi í Úkraínu eftir að héraðsstjórnir í austurhluta landsins hótuðu að skilja sig frá vesturhlutanum og krefjast sjálfsstjórnar, vegna deilunnar um forsetakosningarnar. Stjórnmálakreppan í Úkraínu stigmagnast og halda tugþúsundir áfram að mótmæla úrslitum forsetakosninganna, sjöunda daginn í röð. Mótmælendur hafa hindrað aðgang að stjórnarbyggingum í Kænugarði og lýst yfir stuðningi við Júsjenkó, leiðtoga stjórnarandstöðunnar, sem segir að Janúkóvits, forsætisráðherra, hafi verið tryggður sigur í kosningunum með svindli. Hæstiréttur Úkraínu tekur á morgun fyrir kæru Júsjenkós, um meint kosningasvik, en fátt bendir til þess að lausn sé í sjónmáli. Kútsma, fráfarandi forseti, fundaði með öryggisráði landsins vegna ólgunnar. Hann sagði að yfirvöld ættu að gera allt til þess að reyna að koma í veg fyrir að hættuástand skapaðist. Mikilvægast af öllu væri að viðræður um lausn hæfust strax. Janúkóvits, forsætisráðherra, nýtur mikils stuðnings í austurhluta landsins, en Júsjenkó í vesturhlutanum, sem þykir hallur undir vesturveldin. Héraðsstjórnir í austurhlutanum hafa hótað að skilja sig frá vesturhlutanum og krefjast sjálfsstjórnar, verði úrslit forsetakosninganna ekki staðfest. Kvasníevskí, forseti Póllands, sem er í Kænugarði, til að reyna að miðla málum, varar við sundrungu landsins og Evrópusambandið telur best að forsetakosningarnar verði endurteknar sem fyrst. Þær hugmyndir hafa vakið mikla reiði meðal stuðningsmanna forsætisráðherrans.