Gítar stolið frá Klakabandinu

"Við vorum að spila á útidansleik á færeyskum dögum á Ólafsvík," segir Sigurður Höskuldsson, skipverji á Ólafi Bjarnasyni og hljómsveitarmeðlimur í Klakabandinu. Sigurður varð fyrir því óhappi um helgina að gítarnum hans var stolið. "Við hættum að spila um eittleytið eftir skemmtilegt gigg og vorum búnir að pakka öllu saman og setja inn í flutningabíl. Svo fengum við símtal seinna um kvöldið þar sem okkur var sagt að einhverjir unglingar hefðu brotist inn í bílinn. Við fórum á staðinn en gítarinn minn var það eina sem var horfið," segir Sigurður. "Þetta var Sender Stratocaster sem ég eignaðist fyrir tíu árum, ég er mjög svekktur og langar mikið að fá gítarinn aftur." Klakabandið er klassísk sveitaballahljómsveit. "Þetta er rótgróið band og við erum alls staðar," segir Sigurður sem er einn af þremur Sigurðum í Klakabandinu en Sigurður Höskuldsson hefur sjálfur gefið út diskana Gegnum glerið árið 1998 og Heflaður árið 2002. Hljómsveitarmeðlimir Klakabandsins eru flestir frá Ólafsvík og spila aðallega á Vesturlandinu. "Við skreppum einstaka sinnum til Reykjavíkur, spilum svona helgi og helgi, en síðast þegar við gerðum það spiluðum við á Kringlukránni."