Sorgartímar hjá Muse

Pabbi trommuleikara Íslandsvinanna í Muse lést stuttu eftir að hafa horft á son sinn spila með sveitinni á Glastonbury tónleikahátíðinni. Það voru stærstu tónleikar sem sveitin hefur haldið á ferli sínum. Í kjölfarið aflýsti sveitin fyrirhuguðum tónleikum sínum á Ítalíu og í Belgíu. Umboðsmaður sveitarinnar sendi frá sér fréttatilkynningu á heimasíðu sveitarinnar. "Það er með sorg í hjarta sem við neyðumst til þess að tilkynna að Herra Bill Howard, pabbi Dominic trommara, dó snemma á mánudagsmorgunn á Glastonbury hátíðinni, stuttu eftir að sveitin fór af sviði. Herra Howard féll saman á staðnum klukkan 1.15 eftir miðnætti og dó skömmu síðar. Lögreglan á svæðinu segir ekkert dularfullt við dauða hans. Þetta er mjög erfiður tími innan sveitarinnar, og við óskum þess að þið virðið einkalíf Dominic, fjölskyldu hans og vina." Vegna þessa er nú frekar ólíklegt að Muse komi fram á Hróarskelduhátíðinni um næstu helgi.