Páfagarður kannar barnaklám

Vatíkanið hefur meinað austurískum biskup að tjá sig opinberlega um barnaklámsmál sem kom upp í kaþólskum prestaskóla í umdæmi hans fyrir skemmstu. Þá hefur Vatíkanið sent erindreka sinn til að rannsaka málið á eigin spýtur. Þetta er eitt mesta hneykslismál innan kaþólsku kirkjunnar síðastliðinn áratug. Biskupinn hefur fallið í ónáð margra með því að segja málið strákapör sem hafa verið blásin upp. Um það bil 40 þúsund ljósmyndir fundust með barnaklámi og mikið af myndböndum auk þess sem eitthvað af barnaklámi fannst í tölvum skólans.