Vextir á lánum ennþá hærri hér

Vextir á íbúðalánum hér á landi eru enn mun hærri en í nágrannalöndunum, þrátt fyrir vaxtalækkun síðustu viku, sé mið tekið af verðtryggingu lána. Vaxtalækkun á húsnæðislánum síðustu vikuna hefur mælst vel fyrir og hefur verið nóg að gera hjá viðskiptabönkunum við að afgreiða umsóknir um húsnæðislán. En vaxtastigið segir ekki alla söguna, því hér á landi eru húsnæðislán undantekningarlaust verðtryggð. Neytendasamtökin telja verðtrygginguna tímaskekkju og í raun dulbúna vexti. Jóhannes Gunnarsson, formaður Neytendasamtakanna, segir að þegar bornir séu saman vextir á langtímalánum hér á landi og í nágrannalöndunum, verði að taka tillit til þess að Ísland er eina landið þar sem er verðtrygging. Þegar verðtryggingin sé lögð ofan á þessa vexti sem eru rúm fjögur prósent, sé líklegt að vaxtastig hér á landi sé ennþá hærra en í nágrannalöndunum. Jóhann segir forsendur hér á landi ekki vera með öðrum hætti en í nágrannalöndunum og því vilji neytendasamtökin að verðtryggingin verði afnumin, og því fyrr því betra. Beðið hefur verði eftir útspili stærstu lífeyrissjóða, enda skipta lífeyrissjóðslán með veð í húseignum tugþúsundum. Lífeyrissjóður starfsmanna ríkisins hefur þegar ákveðið að lækka vexti, en þó verður ekki ljóst fyrr en í september hver vaxtaprósentan verður. Lífeyrissjóður Verslunarmanna tekur ákvörðun um vaxtastig á morgun og á hún að taka gildi strax á miðvikudag, 1. september. Þorgeir Eyjólfsson, forstjóri Lífeyrissjóðs Verslunarmanna, segir að vextir muni þá lækka verulega. Vaxtalækkun lífeyrissjóða nær einnig til eldri lána, þannig að sjóðsfélagar, sem þegar greiða af lánum þurfa ekki að taka ný lán, heldur lækka vextirnir sjálfkrafa. En með vöxtum á húsnæðislánum er ekki öll sagan sögð. Íslandsbanki spáir því að Seðlabankinn hækki stýrivexti sína í þessari viku. Bankinn hefur þegar hækkað vexti í þremur skrefum að undanförnu, eða úr 5,3% í 6,25%. Hagvöxtur og mikil einkaneysla mælir með hækkun vaxta auk þess sem verðbólga er komin yfir verðbólgumarkmið Seðlabankans. Nú þegar lánaframboð eykst, er því spáð að verðbólgan kunni að aukast frekar, með meiri einkaneyslu landsmanna.