Vilja fella neyðarlög úr gildi

Tíu útlendingar, sem haldið hefur verið í Bretlandi í nærri því þrjú ár án ákæru, töpuðu áfrýjunarmáli í morgun. Þeir eru grunaðir hryðjuverkamenn. Mannréttindasamtök og breskir þingmenn hafa hvatt stjórnvöld í Bretlandi til að fella úr gildi neyðarlög sem þau settu eftir hryðjuverkin ellefta september. Lögin leyfa þeim að halda meintum hryðjuverkamönnum án ákæru en þess í stað fara þeir fyrir sérstakan rétt sem getur úrskurðað þá í fangelsi. Í réttinum þarf ekki að sanna brot hinna grunuðu og er nóg að bresk yfirvöld telji ríka ástæðu til að halda þeim. Nóg er að stjórnvöld telji hættu eða ógn stafa af hinum handteknu. Neyðarlögunum hefur verið beitt í tengslum við 17 handtökur frá ellefta september, en mennirnir eru taldir vera alþjóðlegir hryðjuverkamenn. Þeir hafa verið í haldi í allt að þrjú ár án þess að ákæra hafi verið gefin út á hendur þeim. Flestir mannanna sitja í fangelsum þar sem öryggisgæsla er mikil, einhverjir eru lokaðir inni á spítölum og einn maður situr í stofufangelsi eftir að hann fékk taugaáfall. Tíu freistuðu þess að áfrýja málinu en var neitað. Lögfræðingur mannanna segir það skelfilegt að hægt sé að halda mönnum án dóms og laga og telur hann að upplýsingarnar um aðild mannanna hafi fengist með pyntinum á föngum í Bandaríkjunum.