Saman á ný eftir 7 ára fangelsi

Kennslukonan Mary Kay Letourneau  hefur fengið leyfi dómara í Seattle í Bandaríkjunum til að hitta sinn heittelskaða Vili Fualaau eftir sjö ára aðskilnað. Mary Kay er 43 ára og vakti ástarsamband hennar við Fualaau heimsathygli þegar það hófst fyrir 8 árum. Þá var hann einungis 13 ára gamall og nemandi Mary Kay. Hún varð ólétt og ól honum dóttur. Hún var dæmd til sex ára fangelsisvistar fyrir að hafa haft samræði við ólögráða einstakling og bannað að hitta hann að afplánun lokinni. Mánuði eftir að hafa verið sleppt voru Mary Kay og Fualaau hins vegar komin í koju á nýjan leik og aftur varð hún þunguð og eignaðist níu mánuðum síðar aðra dóttur. Yfirvöldum var þá nóg boðið, þau dæmdu Mary Kay til 7 ára fangelsisvistar sem hún hefur nýlokið við að afplána. Þegar henni var sleppt fylgdi sú skipun reynslulausninni að hún mætti ekkert samband hafa við Fualaau sem nú er 21 árs. En dómari í Seattle sá aumur á parinu í gær, sagði þau bæði verða orðna fullorðna einstaklinga og því gæti enginn hindrað þau í að rugla saman reitum sínum. Það hyggjast þau gera og stofna heimili ásamt dætrum sínum tveimur.