IRA-foringi borinn til grafar

Joe Cahill var borinn til grafar í gær. Það var hann sem stjórnaði írska lýðveldishernum í Belfast snemma á áttunda áratugnum þegar samtökin hófu mannskæðar árásir sínar á Norður-Írlandi. Fremstir í hópi kistubera fóru forystumenn Sinn Fein, Gerry Adams og Martin McGuinness, sem báðir eru grunaðir um að vera ráðamenn í írska lýðveldishernum. Báðir fóru fögrum orðum um Cahill. Adams var undir stjórn Cahill á áttunda áratugnum. Adams sagði Cahill hvort tveggja hafa tekið þátt í að koma á vopnasmygli frá Líbíu Moammars Gaddafi og síðar friðarviðræðum. "Það eina sem mér þykir leitt er að hann skyldi ekki sjá friðarferlið til lykta leitt."