Efnahagsmál ráða líklega úrslitum

Efnahagsmál koma líklega til með að ráða úrslitum í forsetakosningunum í Bandaríkjunum í haust. Flokksþing demókrata hefst í kvöld en þar verður John Kerry formlega tilnefndur sem forsetaframbjóðandi þeirra. Um 5000 flokksþingsfulltrúar og á annan tug þúsunda blaða- og fréttamanna er samankominn í Boston til að fá svar við spurningunni: Hver er John Kerry? Það vita nefnilega fáir samkvæmt könnunum og flokksþinginu er einkum ætlað að breyta því, ná athygli kjósenda og koma Kerry í mjúkinn hjá þeim. Þingið er þrælskipulagt með þetta í huga og leikrit þar sem deilur sem einkennt hafa slík þing áður verða víðsfjarri, eða eiga a.m.k. að vera það. Aðeins nokkrum stundum fyrir upphaf þingsins sýna kannanir hnífjafnt fylgi Kerrys og George Bush og í þeim ríkjum, sem óvíst er hvorum fylgja, skiptist fylgið jafnt. Þeir sem kannað hafa málin segja þessi ríki reyndar ekki nema fimmtán og að líklega verði það ekki nema 15% kjósenda í ríkjunum sem komi til með að ráða úrslitum. Þeir sem til þekkja segja að líklega verði það efnahagurinn sem komi til með að vega þyngst á metunum í haust og samkvæmt nýjustu fréttum þá gengur í fyrsta lagi hægar að koma honum í gang, og það gengur heldur ekki jafn vel. Spurningin er hins vegar hvaða áhrif það hafi; leitar almenningur fyrst og fremst eftir táknum um hvert efnahagur þjóðarinnar er að þróast eða vill hann fá að vita hversu mikið er í buddunni um mánaðamótin?   Allt þetta kemur til með að verða til skoðunar í vikunni og á bak við tjöldin fara einnig fram verulega áhugaverðar umræður sem snúast ekki aðeins um stefnu demókrata eftir kosningar, heldur margt annað. Meira um það eftir því sem vikan líður.  Ingólfur Bjarni Sigfússon, fréttamaður Stöðvar 2 og Bylgjunnar, er á þinginu í Boston og verður með daglega pistla þaðan í vikunni. Hægt er að hlusta á þennan pistil úr kvöldfréttum Stöðvar 2 með því að smella á hlekkinn hér að neðan.