Brúin endurreist eftir stríðið

Mostar-brúin í Bosníu og Hersegóvínu var opnuð á nýjan leik í gær við hátíðlega athöfn. Brúin, sem byggð var á 16.öld, var sprengd upp í stríðinu á Balkanskaga árið 1993 og þykir enduruppbygging hennar táknræn fyrir bætt samband múslima og Króata. Borgarstjóri Mostar segir brúna tákn fyrir nýja byrjun og breytt andrúmsloft á Balkanskaga. Mikil fjöldi safnaðist saman á götum Mostar í gærkvöld til að fagna atburðinum og var flugeldum skotið á loft og skemmtikraftar léku listir sínar. Kostnaður við enduruppbyggingu brúarinnar nam 13 milljónum Bandaríkjadala.