Eitt versta lestarslys Tyrklands

Þrjátíu og sex manns fórust og áttatíu slösuðust í lestarslysi í Tyrklandi í morgun. Þetta er eitt versta lestarslys í sögu Tyrklands. Hraðlest fór út af brautarteinum á milli borganna Istanbul og Ankara. Ýmsir gagnrýnendur höfðu varað við því að gamlir brautarteinar á þessari leið myndu ekki ráða við nýrri og hraðskreiðari gerðir lesta. Lestarnar voru teknar í notkun þann 4. júní. Að minnsta kosti fjórir vagnar fóru út af sporinu nærri þorpinu Mekece en mestar skemmdir urðu á tveimur vögnum sem rákust saman. Slysið átti sér stað rétt fyrir klukkan átta að morgni að staðartíma en þá var enn frekar dimmt sem hamlaði björgunarstarfinu og þurftu björgunarmenn að notast við vasaljós til að hlúa að slösuðum. Mikil ringulreið skapaðist á nærliggjandi sjúkrahúsi sem ekki hafði undan fjölda slasaðra. Þegar birti til komu kranar á staðinn sem lyftu vögnunum af teinunum og samstundis hófust viðgerðir á teinunum. Slysið er nokkurt áfall fyrir ríkisstjórnina sem staðið hefur á bak við endurnýjun lestarkerfisins í Tyrklandi.