Ráðamenn dregnir til ábyrgðar

Réttarhöld sem hafin eru yfir tveimur fyrrum ráðamönnum í gamla Austur-Þýskalandi eru talin þau síðustu þar sem ráðamenn eru dregnir til ábyrgðar vegna dauða fólks sem var skotið til bana þegar það reyndi að flýja til Vestur-Þýskalands fyrir lok Kalda stríðsins. Hans Joachim Böhme og Siegfried Lorenz sem áttu sæti í forsætisnefnd austur-þýska kommúnistaflokksins voru dregnir fyrir dómstól ákærðir fyrir að hafa ráðið ákvarðanatöku sem varð til þess að þrír einstaklingar voru skotnir til bana við flótta til Vesturlanda. Kommúnistastjórnin í Austur-Þýskalandi hafði fyrirskipað að allir sem reyndu flótta yrðu skotnir til bana. Fastlega er búist við að réttarhöldin yfir Böhme og Lorenz verði þau síðustu sinnar tegundar í Þýskalandi.