Á hjólabretti á þýskri hraðbraut

Þýska lögreglan stöðvaði þrjátíu og átta ára gamlan Svía á hraðbraut, nokkur hundruð kílómetra suðvestur af höfuðborginni Berlín, þar sem hann var á hjólabretti. Svíinn sagðist hafa verið á ferðalagi um Balkanlöndin og að hann væri orðinn svo blankur að hann ætti bara tvær evrur eftir. Hann hafði því ekki efni á lestarmiða og hélt að það yrði ekki vandamál að ferðast um á þýsku hraðbrautinni á hjólabretti til vina sinna í Berlín, í þeirri von að þar gæti hann slegið lán. Lögreglan skutlaði manninum að afrein á hraðbrautinni og sagði honum að halda áfram á tveimur jafnfljótum.