Sjálfsvíg í Japan aldrei fleiri

Sjálfsvíg í Japan hafa aldrei verið fleiri en á síðasta ári en þá tóku tæplega 35 þúsund manns líf sitt. Tæpur helmingur, eða 45%, tóku hina örlagaríku ákvörðun vegna slæms heilsufars og ríflega fjórðungur vegna fjárhagsvandræða. Síðarnefnda ástæðan er ört vaxandi orsök sjálfsmorða í landinu. Japanskir karlmenn eru í miklum meirihluta þeirra sem styttu sér aldur á síðasta ári eða 70%. Tíðnin er hæst á meðal fólks á sjötugsaldri, eða 33,5% tilfella, og þar á eftir kemur fólk á sextugsaldri. Sjálfsmorðstíðni í Japan er nú á meðal þeirra hæstu í heiminum en 27 af hverjum 100 þúsund landsmanna tekur líf sitt.