Á annað hundrað létust

Á annað hundrað manns létu lífið þegar háhraðalest fór út af spori sínu á leiðinni milli Istanbúl og Ankara. Yfirvöld sögðu að 139 manns hefðu látið lífið og 57 til viðbótar hefðu særst en 243 voru um borð í lestinni. Aðkoman á slysstað var hræðileg. "Þarna voru höfuð sem höfðu rifnað af líkum," sagði Feridun Turan, borgarstjóri í Pamukova sem er skammt frá slysstaðnum. Fólk sem lifði slysið af leitaði í örvæntingu að ættingjum og kunningjum í von um að finna þá á lífi. Ekki var vitað hver væri orsök slyssins. Engar vísbendingar höfðu fundist um skemmdarverk en sá möguleiki var ekki útilokaður. Suleyman Karaman, yfirmaður tyrkneska lestakerfisins, hafði eftir ökumanni lestarinnar að hún hefði verið á eðlilegum hraða og að ökumaðurinn skildi ekki hvað hefði farið úrskeiðis. Háhraðalestin var tekin í notkun fyrir hálfum öðrum mánuði síðan. Þá var gagnrýnt að lestarsporin hefðu ekki verið endurnýjuð og þyldu ekki nýju lestina.