Flugræningjarnir stoppaðir 11.9.

Myndir úr eftirlitsmyndavélum á Dulles-flugvelli í Washington sýna að flugræningjarnir sem grönduðu flugvélunum þann 11. september 2001 voru teknir til hliðar við málmleitarhliðin en var síðan leyft að halda áfram, án frekari athugunar. Málmleitartæki í hliðinu fór af stað þegar flugræningjarnir fóru í gegn. Starfsmenn flugvallarins drógu þá afsíðis til frekari athugunar en þeim var síðar leyft að fara í gegn. Þriðji maðurinn var einnig stoppaður og var leitað í farangri hans eftir sprengiefnum. Mennirnir stigu síðar inn í flug 77 á vegum American Airlines sem þeir stýrðu síðar á Pentagon-bygginguna. Talið er að þeir hafi komist í gegn með vinnu- og dúkahnífa sem þeir notuðu til að drepa flugmennina en á þeim tíma voru slíkir hnífar leyfðir í innlandsflugi í Bandaríkjunum. Tveir mannanna höfðu hins vegar verið tengdir hryðjuverkasamtökunum al-Kaída og þremur vikum áður voru þeir eftirlýstir um öll Bandaríkin. Enginn bar hins vegar kennsl á mennina. Nokkrar fjölskyldur ætla að fara í mál við flugfélögin fyrir glöp í starfi. Flugfélögin höfðu öll verið vöruð við, nokkrum vikum fyrir 11. september. Nefndin sem rannsakað hefur hvað fór úrskeiðis í Bandaríkjunum í tengslum við hryðjuverkin gerði niðurstöður sínar opinberar í dag. Nefndin gagnrýnir ríkisstjórnir George W. Bush og Bill Clintons og bandaríska þingið fyrir að hafa ekki tekið hryðjuverkaógnina alvarlega. Mesta gagnrýni fengu þó Alríkislögreglan (FBI) og Leyniþjónusta Bandaríkjanna (CIA) fyrir að hafa brugðist.